Norsk og finsk forsvarssjef i bilaterale samtaler

Over fleire dagar besøkte ein delegasjon frå det finske forsvaret Noreg. På programmet stod både samtaler om vidare samarbeid og besøk på norske basar. Både kampflybasen på Ørland og Luftforsvarets base på Evenes var del av programmet.

Noreg er F-35-pioner

– Hovudhensikta med besøket er å vidareføre erfaringane våre med F-35. Vi har hatt F-35 i Noreg sidan 2017 og gjort oss mange erfaringar når det gjeld drift, og Noreg er òg langt framme når det gjeld utviklinga og bruk av dette systemet. Dette er erfaringar det finske forsvaret òg er interesserte i, sidan Finland skal erstatte sine jagarfly med nettopp F-35, seier forsvarssjef Eirik Kristoffersen.

Det er naturleg at eit slikt besøk handlar om F-35, fortel den finske forsvarssjefen.

– Noreg er på mange måtar pionerar når det gjeld F-35, og vi har mykje å lære av den svært verdifulle kunnskapen deira, fortel general Janne Jakkola, som tidlegare i år blei tilsett som forsvarssjef i Finland.

Støtte til Ukraina

Men dei to landa sine forsvarssjefar fekk òg diskutert andre tema som gjeld felles interesser.

– Vi har snakka om fleire tema. Mellom anna moglegheita for vidare støtte til Ukraina, og vi har snakka saman om situasjonen med vårt felles naboland Russland, slik at vi har ei felles forståing av den situasjonen. Men vi har òg diskutert vegen vidare for meir og betre samarbeid når det gjeld vidareutviklinga av felles øvingsaktivitetar som Nordic Response og Joint Viking, seier Kristoffersen.

Etter at Sverige og Finland blei medlemmer av NATO, har dei nordiske landa betre moglegheit til å styrke samarbeidet bilateralt gjennom alliansen.

– Situasjonen i tryggingsmiljøet vårt, samarbeidet mellom landa våre og felles innsats gjennom felles øvingar er det derfor naturleg å diskutere, fortel den finske forsvarssjefen.