Takka av siste NCC-stab

​​Med dette er Noregs ISAF-bidrag formelt avslutta. Dette blei markert med ein høgtideleg seremoni på Kabul internasjonale flyplass sundag. Sjefen for Forsvarets operative hovudkvarter, generalløytnant Morten Haga Lunde, meiner Forsvaret har lukkast i oppdraget.

– I 13 år har soldatar frå 51 land gitt eit avgjerande bidrag for auka tryggleik og kampen mot terrorisme. Vi minnest dei som har gitt sine liv, og som er blitt såra i tenesta for fred, tryggleik og stabilitet i Afghanistan. Det står stor respekt av Noregs totalt 9 000 soldatar og innsatsen deira, seier Lunde.

​Oppdrag utført

Ifølgje generalløytnanten er ikkje Afghanistan lenger utgangspunktet for internasjonal terrorisme.

– Militært kan vi no seie «mission accomplished». Vi har lukkast i å byggje tryggingsstyrkar som er rusta til å ta hand om tryggleiken i eige land, meiner Lunde.

Han seier det er viktig at afghanske styresmakter no tek ansvaret for utviklinga i landet. 

– Tryggingssituasjonen i Afghanistan vil fortsatt vere utfordrande. Organisert kriminalitet, gjerne kobla med ulovleg narkotikaproduksjon og maktstrukturar som Taliban, vil fortsatt vere krevjande for styresmaktene i Afghanistan, seier Lunde.​

Dyktig stab

Oberst Petter Gjersem, den siste sjefen for den norske kontingentstaben i Afghanistan, meiner dei gode resultata skuldast medarbeidarane. Han meiner dei har sikra gode rapportar og sendt truverdige anbefalingar heim til Forsvaret.

– Vi har ytt service for heile det norske styrkebidraget. Vi har lukkast fordi vi har hatt dyktige, m​otiverte og serviceinnstilte medarbeidarar som har hjelpt kvarandre med å løyse oppdraget. Eg takkar staben for innsatsen og den gode kameratskapen, seier Gjersem.​