Trena på torpedotruslar med britisk fregatt
Dei siste vekene har den årlege ubåtøvinga Grüner Aal pågått i området sør for Bergen. Øvinga er ei bilateral torpedo-skyteøving, med fokus på realistiske og varierte scenario.
På grunn av COVID har det vore utfordrande for utanlandske fartøy å delta. I år var det ubåten KNM Uredd, logisitkkfartøyet KNM Magnus Lagabøte, slepefartøyet HS4 Mjølner og den britiske fregatten HMS Northumberland som trena saman på anti-ubåt og overflatekrigføring.
Eit viktig mål med øving Grüner Aal var å trene på torpedoskyting frå Ubåt på ulike nivå og i ulike scenario. Det har også vore unike moglegheiter for overflateeiningar til å øve på reelle torpedotruslar og trene på mottiltak.
Godt utbytte av treninga
KNM Uredd har fått godt utbytte av å trene saman med den britiske fregatten HMS Northumberland.
– HMS Northumberland er ein stillegåande fregatt som er designa for anti-ubåtkrigføring. Den har eit høgt øvingsnivå, noko som skapar eit utgangspunkt for god trening for KNM Uredd, seier skvadronssjef i 1. Ubåtskvadron orlogskaptein Bård Hess.
Norske ubåtar er også ettertrakta samarbeidspartnerar for utanlandske fartøy. Ula-klassen er stillegåande og vanskeleg for fregattar å registrere.
– Ei øving på slikt nivå hever kompetansen både for den enkelte, men og for heile organisasjonen som må handtere ein eventuell trussel, avsluttar Hess.