Forsvarets spesialstyrkar på øving i Ghana

Utdannar afrikanske styrkar

Dei norske spesialsoldatane bisto under øvinga med mentorering og opplæring av spesialstyrkar i regionen. Etterretningpersonellet inngjekk i ein Special Operations Task Unit og ein Special Operation Task Group.

– FSK har saman med amerikanarane dreve utdanning, trening og øving av dei afrikanske styrkane, seier Eidheim som besøkte deltakarane saman med den norske ambassadøren i Ghana under øvinga.

Upåklageleg samarbeid

Utdanninga har bestått av mellom anna skyteopplæring, taktikk, sanitet og operasjonsplanlegging. Ved sida av dette har dei norske deltakarane dreve egentrening åleine og med amerikanarane. Dei har budd tett på kanadiarane og delteke i møter, koordinert og samarbeidd med fleire nasjonar, mellom anna Canada, Frankrike, Danmark, Belgia, Storbritannia og Tyskland.

– Samarbeidet med spesielt USA og Canada er upåklageleg. Det norske personellet opplever å lære mykje av å gjennomføre aktivitet saman, og får tilbakemelding på at Noreg er ein verdsett partnar, fortel Eidheim.

Vidare fundament

Gode relasjonar til regionale styresmakter, saman med nettverk av nære allierte, dannar vidare eit avgjerande fundament for spesialstyrkane sin beredskap innan global krisehandtering.

– Dette hadde ikkje vore mogleg utan den svært gode støtta frå den norske ambassaden i Accra, avsluttar spesialstyrkesjefen.