Noreg styrkjer bidraget til NATO-styrken i Litauen
Noreg sender fleire soldatar til NATO enhanced Forward Presence (eFP) i Litauen. Total er det snakk om 50–60 soldatar med kjerne i ei mekanisert infanteriavdeling.
Det kunngjorde regjeringa på ein pressekonferanse tysdag føremiddag. Bakteppet er den spente tryggleikssituasjon i og rundt Ukraina.
– Vi ønskjer å bidra til styrkt alliert nærvære i Baltikum for å vise solidaritet med våre allierte. For vår del gjer vi dette best ved å forsterke det styrkebidraget vi allereie har i Litauen, seier forsvarsminister Odd Roger Enoksen.
Deltatt sidan 2017
Enhanced Forward Presence (EFP) blei etablert av NATO i 2017 og er eit defensivt og roande tiltak. EFP er ein sentral del av det alliansens kollektive forsvar og avskrekking i Baltikum og Polen. Noreg har hatt styrkar i stridsgruppa i Litauen samanhengande sidan starten i 2017.
Per februar 2022 har Noreg eit mekanisert infanterikompani frå Brigade Nord på 150 soldatar i Litauen. No blir denne styrken forsterka med ytterlegare ei infanteriavdeling på 50–60 soldatar.
Denne styrken skal depolyere raskt til Litauen, og dei skal i utgangspunktet vere der i tre månader. Denne perioden kan bli forlenga.
– Krevjande tryggingssituasjon
Grunnen til styrkinga er situasjonen i og rundt Ukraina.
– Vi er i ei svært krevjande tryggingssituasjon i Europa. Den massive russiske oppbygginga rundt Ukraina, og krava til USA og Europa, har endra situasjonen i Europa. Dette påverkar òg Noreg, og vi følgjer situasjonen nøye, seier Enoksen.
Noreg er NATOs auge og øyrer i nord og held kontinuerleg oversikt over land- og havområda våre.
– Vi er denne vinteren vertskap for militærøvinga Cold Response. Dette er ei øving som viser alliert styrke, samhald og evne til forsvar. Samstundes støttar vi oppunder NATO. Vi aukar hærbidraget til eFP i Litauen, og vi bidrar gjennom det vi har melde inn i NATOs reaksjonsstyrkar og ståande flåtestyrkar, seier Enoksen.
