Forsvarets andre statusrapport på varslingshandtering
Forsvaret har no levert sin andre statusrapport på oppfølging og handsaming av varslingssaker.
Forsvarssjefen sende denne veka sin andre statusrapport på varslingshandtering i Forsvaret til Forsvarsdepartementet. Rapporten er ei oppfølging av den første statusrapporten til forsvarsministeren i juni 2022. Rapporten tar òg for seg funna og følgjer opp føreslåtte tiltak som PwC peika på i si evaluering, som blei levert Forsvaret 18. november i år.
Forsvaret har sidan mai 2022 jobba aktivt med å forbetre evna til å handtere varslingssaker. Fleire av tiltaka i PwCs evaluering er allereie implementerte – som følgje av føreslåtte tiltak i den første statusrapporten i juni. Mellom anna har Forsvaret sett ned ei eiga referansegruppe som skal følgje opp varslingsarbeidet, og Forsvaret styrkjer Hæren, Sjøforsvaret og Luftforsvaret med to faste årsverk kvar. Dei nye stillingane skal etter planen fyllast i løpet av første halvår 2023.
I tillegg jobbar Forsvaret med etablering av ei sentral varslingseining, betra teknisk støtte, forenkla prosedyrar, kompetanseheving, lik oppfølging, riktige sanksjonar og reaksjonar, dokumentasjon og rutinar for tilsetting av personell med ilagde tenestlege reaksjonar.
Det vidare arbeidet fortset utover neste år, og ein ny statusrapport frå Forsvaret kjem til departementet før sommaren 2023.