Ein grøn samtalepartnar

Joachim Haaland, studentprest ved NTNU i Ålesund, markerte Heimevernet sin Uniform på jobben-dag ved å møte opp i si feltprestuniform den 6. desember. Denne dagen, som oppmodar tilsette i Heimevernet til å bere uniform på sine sivile arbeidsplassar, gir ei unik moglegheit til å synleggjere Heimevernet si rolle i samfunnet.

Ei ære

Joachim, som også er feltprest i Møre og Fjordane heimevernsdistrikt, viste med stoltheit fram si doble rolle som både sjelesørgar og samtalepartnar for studentar og som ein del av Noregs forsvar.

– Det er ei ære å kunne representere Heimevernet og vise korleis vi bidreg til samfunnets tryggleik og beredskap, seier Joachim, som også jobbar to dagar i veka ved Ålesund fengsel som fengselsprest.

Forsvaret opna auga

Joachim fortel at vegen hans til presteyrket starta uventa. Oppvaksen på bedehuset, var tanken på å bli prest fjern, men førstegongstenesta i Sjøforsvaret opna augo hans for ein annan måte å vere prest på.

Etter å ha mislykkast i å kome inn på sitt opphavlege studieval, byrja han på eit årsstudium i kristendom ved NLA Høgskolen i Bergen.

– Dette året vart til fleire, og kallet til presteyrket vart sterkare. Etter fem år på NLA og eit halvår ved Misjonshøgskolen i Stavanger, vart eg kapellan i Ålesund og Volsdalen sokn.

Tett på studentane

Joachim skildrar jobben sin som svært variert, med hovudfokus på å vere tett på menneske. Måndag og tysdag tilbringar han i Ålesund fengsel, medan onsdag til fredag er han på NTNU i Ålesund. Han held jamlege gudstenester i fengselet og bidreg i beredskapsarbeidet ved kriser og hendingar med studentar. I tillegg tenestegjer han som distriktsprest i Møre og Fjordane heimevernsdistrikt ni dagar i året. I løpet av desse dagane gjennomfører han samtalar med soldatar i områdestrukturen, underviser på lagførarkurs og bidreg på ulike seremonier, som på Forsvaret sin minnedag i november og den årlege kyrkjeparaden i Grytten kyrkje før jul.

Glad i menneske

Det beste med jobben, ifølgje Joachim, er tilliten han får frå studentar og innsette. Han føler seg privilegert som får vere ein medvandrar for folk som opplever livets utfordringar.